guloñ ke chehra-e-rañgīñ pe vo nikhār nahīñ

bahār aa.ī magar ālam-e-bahār nahīñ

jo haath aatā hai dāman to chhoḌ detā huuñ

junūñ-navāz abhī mausam-e-bahār nahīñ

kisī kī yaad kā aalam na pūchhiye mujh se

kabhī qarār hai dil ko kabhī qarār nahīñ

ye bāñkpan ye adā ye shabāb kā aalam

tum aa ga.e to kisī kā ab intizār nahīñ

bahār par bhī ḳhizāñ hī kā rañg ġhālib hai

havā zamāne kī gulshan ko sāzgār nahīñ

hamāre sāmne vo haiñ kahīñ ye ḳhvāb na ho

ab apnī āñkhoñ pe bhī ham ko e.atibār nahīñ

ḳhud aa ga.e haiñ simaT kar nigāh meñ jalve

visāl-e-dost hai ye rañj-e-intizār nahīñ

mirā mazāq uḌātā hai ā.īna lekin

mirī haqīqat-e-ġham us pe āshkār nahīñ

hamārī ābla-pā.ī kā faiz kyā kahiye

vo kaun sā hai bayābāñ jo lāla-zār nahīñ

butoñ ko puuj rahā hai tire tasavvur meñ

gunāh kar ke bhī 'faizī' gunāhgār nahīñ