abhī tak chashm-e-qātil se pashemānī nahīñ jaatī
nadāmat ḳhūn-e-nāhaq kī ba-āsānī nahīñ jaatī
haqīqat parda-e-bātil meñ chhup jaa.e ye nā-mumkin
pas-e-fānūs bhī sho.aloñ kī uryānī nahīñ jaatī
farishte mahv-e-hairat rah ga.e parvāz-e-insāñ par
vahāñ pahuñchā jahāñ tak aql-e-insānī nahīñ jaatī
sitamgārī asar kartī nahīñ rañgīñ tabī.at par
qafas meñ bhī anādil kī ġhazal-ḳhvānī nahīñ jaatī
na ho jaa.e kahīñ zer-o-zabar ye ā.īna-ḳhāna
nigāh-e-'shauq' se jalvoñ kī hairānī nahīñ jaatī