kabhī milī jo tire dard kī navā mujh ko
ḳhamoshiyoñ ne mujhī se kiyā judā mujh ko
badan ke suune khañDar meñ kabhī jalā mujh ko
maiñ terī ruuh kī zau huuñ na yuuñ bujhā mujh ko
maiñ apnī zaat kī ham-sā.egī se Dartā huuñ
mire qarīb ḳhudā ke liye na lā mujh ko
maiñ chup huuñ apnī shikast-e-sadā kī vahshat par
mujhe na bolnā paḌ jaa.e mat bulā mujh ko
ye maiñ thā yā mire andar kā ḳhauf thā jis ne
tamām umr dī tanhā.ī kī sazā mujh ko
bhaTak rahā huuñ maiñ be-samt rāstoñ kī tarah
kisī bhī samt kā ho rāsta dikhā mujh ko
har ik ne dekhā mujhe apnī apnī nazroñ se
koī to merī nazar se bhī dekhtā mujh ko
samo ke āñkhoñ meñ umDī ghaTā.eñ ai 'āzād'
vo ek dard kā sahrā banā gayā mujh ko