aane vaale hādsoñ ke ḳhauf se sahme hue
log phirte haiñ ki jaise ḳhvāb hoñ TuuTe hue
sub.h dekhā to na thā kuchh paas uljhan ke sivā
raat ham baiThe rahe kis soch meñ Duube hue
apne dukh meñ Duub kar vus.at milī kaisī hamīñ
haiñ zamīñ se āsmāñ tak ham hī ham phaile hue
aaj ā.īne meñ ḳhud ko dekh kar yaad aa gayā
ek muddat ho ga.ī jis shaḳhs ko dekhe hue
jism kī dīvār gir jaa.e to kuchh ehsās ho
apne andar ham paḌe haiñ kis qadar simTe hue
kis se pūchheñ rāt-bhar apne bhaTakne kā sabab
sab yahāñ milte haiñ jaise niiñd meñ jaage hue
is nagar ke jagmagāte rāstoñ par ghuum kar
ham chale aa.e ġhamoñ kī dhuul meñ lipTe hue
jin ko ai 'āzād' baḳhshī thī mahak ham ne kabhī
ab vahī raste hamāre vāste kāñTe hue