gul kī aur bulbul kī sohbat ko chaman kā shāna hai

sarv hai juuñ sham.a tis par fāḳhta parvāna hai

roz o shab yā nauha yā zaarī hai yā āh-o-fuġhāñ

yā ilāhī ye koī dil hai ki mātam-ḳhāna hai

tan kar us kī teġh ke aage huā hai sar-ba-kaf

hai qayāmat hai ġhazab ye dil hai yā dīvāna hai

bulbul-e-tasvīr kī mānind said-e-dil ke ta.iiñ

ne havā uḌne kī ne parvā-e-āb-o-dāna hai

ek hālat par na dekhā us ko ham ne ek aan

gah gul o gah bulbul o gah sham.a o gah parvāna hai

mo.atakif ho shaiḳh apne dil meñ masjid se nikal

sāhib-e-dil kī baġhal meñ dil ibādat-ḳhāna hai

mai-kasho mujh ko tumhārī bazm kī hasrat nahīñ

paas mere diida o dil shīsha o paimāna hai

ḳhvāb meñ the jab talak thā dil meñ duniyā kā ḳhayāl

khul ga.iiñ āñhkeñ to dekhā ham ne sab afsāna hai

sher ustādāna o 'hātim' hai be-bākāna-vaz.a

tab.a āzādāna o auqāt darveshāna hai