kaun dil hai ki tire dard meñ bīmār nahīñ
kaun jī hai ki tire ġham meñ giraftār nahīñ
kaun dhrā hai ki tujh but kī nahīñ hai puujā
kaun masjid hai ki tujh dars kī takrār nahīñ
kaun ḳhush-rū hai ki tujh rū kā nahīñ hai tālib
kaun tālib hai ki tujh shai kā talabgār nahīñ
kaun suufī hai ki tujh mai se nahīñ hai mad.hosh
kaun kaifī hai ki tujh kaif se hushiyār nahīñ
kaun kahtā hai ki 'hātim' ko nahīñ tujh se pyaar
kaun kahtā hai ki 'hātim' se tujhe pyaar nahīñ