vo qalandaroñ meñ shumār hai
ġham-e-zīst se use pyaar hai
mire bāġh-e-dil ke nasīb meñ
faqat intizār-e-bahār hai
ġham-e-āshiqī se jo pūchhiye
ye jahāñ bhī ujḌā dayār hai
jise taaj kahtā hai ye jahāñ
vo haqīqatan to mazār hai
ye ajab nahīñ ki junūn-e-ishq
sar-e-dār thā sar-e-dār hai
maiñ jo haq-e-halāl kī rah pe huuñ
mujhe ḳhvāb meñ bhī qarār hai
mirī dhaḌkaneñ bhī haiñ bahr meñ
mujhe shā.irī kā ḳhumār hai