miTā diyā mire saaqī ne ālam-e-man-o-tū
pilā ke mujh ko mai-e-la-ilāha-illa-hū
na mai na sher na saaqī na shor-e-chañg-o-rabāb
sukūt-e-koh o lab-e-jū va lāla-e-ḳhud-rū
gadā-e-mai-kada kī shān-e-be-niyāzī dekh
pahuñch ke chashma-e-haivāñ pe toḌtā hai subū
mirā sabūcha ġhanīmat hai is zamāne meñ
ki ḳhānqāh meñ ḳhālī haiñ sūfiyoñ ke kadū
maiñ nau-niyāz huuñ mujh se hijāb hī aulā
ki dil se baḌh ke hai merī nigāh be-qābū
agarche bahr kī maujoñ meñ hai maqām is kā
safā-e-pāki-e-tīnat se hai guhar kā vuzū
jamīl-tar haiñ gul o laala faiz se is ke
nigāh-e-shā.ir-e-rañgīñ-navā meñ hai jaadū