kamāl-e-tark nahīñ āb-o-gil se mahjūrī

kamāl-e-tark hai tasḳhīr-e-ḳhākī o nuurī

maiñ aise faqr se ai ahl-e-halqa baaz aayā

tumhārā faqr hai be-daulatī o rañjūrī

na faqr ke liye mauzūñ na saltanat ke liye

vo qaum jis ne gañvā.ī matā-e-taimūrī

sune na sāqi-e-mehvash to aur bhī achchhā

ayyār-e-garmi-e-sohbat hai harf-e-māzūrī

hakīm o aarif o suufī tamām mast-e-zahūr

kise ḳhabar ki tajallī hai ain-e-mastūrī

vo multafit hoñ to kunj-e-qafas bhī āzādī

na hoñ to sehn-e-chaman bhī maqām-e-majbūrī

burā na maan zarā aazmā ke dekh ise

farañg dil kī ḳharābī ḳhirad kī māmūrī