kahāñ koī ḳhazāna chāhtā huuñ
zarā sā muskurānā chāhtā huuñ
mujhe maujeñ uchhāle jā rahī haiñ
maiñ kab se Duub jaanā chāhtā huuñ
jo purkhoñ kā sunahrā kal yahī hai
to vāpas lauT jaanā chāhtā huuñ
koī dil ho kirā.e kā makāñ hai
maiñ ab zaatī Thikāna chāhtā huuñ
ḳhudā merī anā mahfūz rakkhe
maiñ do roTī kamānā chāhtā huuñ
jo tū aa.e bisāt-e-zindagī par
to ḳhud ko haar jaanā chāhtā huuñ