dil kī rāheñ raushan karte rahte haiñ

kis ke ghuñghrū chhan-chhan karte rahte haiñ

duniyā jis kī khoj meñ pāgal phirtī hai

ham to us ke darshan karte rahte haiñ

indar kī be-rañgī shāyad chhup jaa.e

bāhar rañg-o-roġhan karte rahte haiñ

un se pūchho aane vaalī rut kā haal

jo patjhaḌ ko sāvan karte rahte haiñ

un ke dil meñ ghar kar lenā mushkil hai

chaTTānoñ meñ rauzan karte rahte haiñ

chup rahte haiñ jin meñ kuchh bhī hotā hai

ḳhālī Dabbe khan-khan karte rahte haiñ