vo pahle fikr ko harf-e-kamāl detā hai
phir āgahī se suḳhan ko ujaal detā hai
mujhī ko log bahut saḳht-jāñ samajhte haiñ
mujhī pe har koī patthar uchhāl detā hai
vo aks ban ke utartā hai jab bhī āñkhoñ meñ
tamām aa.ine dil ke ujaal detā hai
mohabbatoñ kā use merī e'tibār nahīñ
magar raqīboñ ko merī misāl detā hai
kisī ko phuul se lagte haiñ ishq meñ patthar
kisī ko tesha bhī shauq-e-visāl detā hai
'suḳhan' hayāt meñ kuchh aise moḌ aate haiñ
har ek lamha ḳhushī kā malāl detā hai