na dushmanoñ se vatan meñ rahā kabhī mahfūz
jilā-vatan huuñ to lagtī hai zindagī mahfūz
na jaane kaun sā ġham murtasim hai is dil par
ki mere hoñToñ ne kar lī hai ḳhāmushī mahfūz
kamāl-e-zabt bhī ab is se baḌh ke kyā hogā
hamāre siine meñ rahtā hai dard bhī mahfūz
jo aa.e mere ta.āqub meñ ho ga.e ġharqāb
hai merī naav kināre pe aaj bhī mahfūz
ye mo.ajiza bhī dikhāyā hai āgahī ne hameñ
siyāh-ḳhānoñ meñ kar lī hai raushnī mahfūz