ġhuncha-e-vasl sar-e-shām khilā de aa kar
hijr kī rut meñ koī muzhda sunā de aa kar
raqs jaarī hai lahū kā mirī shiryānoñ meñ
barbat-e-rūh meñ āvāz milā de aa kar
log mar jaate haiñ be-chāra-garī ke hote
dam-e-īsā bhī nahīñ ab ki jilā de aa kar
isī ummīd pe sab ahl-e-karam baiThe haiñ
koī saa.il kī tarah aa.e sadā de aa kar
muskurā kar mirī ġhazloñ ko paḌhā kartā hai
sher apne bhī kabhī yaar sunā de aa kar
naav kāġhaz kī liye baiThā huuñ jaane kab se
aa idhar sail-e-ravāñ is ko bahā de aa kar