chhā gayā sar pe mire gard kā dhuñdlā bādal

ab ke sāvan bhī gayā mujh pe na barsā bādal

siip bujhte hue sūraj kī taraf dekhte haiñ

kaisī barsāt mirī jaan kahāñ kā bādal

vo bhī din the ki Tapaktā thā chhatoñ se pahroñ

ab ke pal bhar bhī muñDeroñ pe na Thahrā bādal

farsh par gir ke bikhartā rahā paare kī tarah

sabz bāġhoñ meñ mire ba.ad na jhūlā bādal

laakh chāhā na milī pyaar kī pyāsī āġhosh

ghar kī dīvār se sar phoḌ ke royā bādal

aaj kī shab bhī jahannam meñ sulagte hī kaTī

aaj kī shab bhī to botal se na chhalkā bādal