diloñ meñ habs kā aalam purānī ādatoñ se hai
laboñ par talḳhiyoñ kā zahar bigḌe zā.iqoñ se hai
jo ujḌā shahar ḳhvāboñ kā to apnī bhī uḌī hai gard
kisī sūkhe hue dariyā kī sūrat muddatoñ se hai
ye kaalī raat kā dariyā bahā kar le gayā sūraj
hirāsāñ sub.h ke sāhil pe dil tārīkiyoñ se hai
mahakte phuul bhī Dasne lage haiñ saañp kī sūrat
fazā bāġhoñ ke andar bhī diloñ ke mausamoñ se hai
unhīñ lamhoñ kī aahaT se milīñ bedāriyāñ mujh ko
mire dariyā kī jaulānī samay ke pāniyoñ se hai
vo aañch aane lagī ḳhud se ki dil Darne lagā apnā
jahannum ruuh kā bhaḌkā huā ḳhāmoshiyoñ se hai
khulīñ āñkheñ to sil nuur meñ Duubā huā paayā
mire sūraj kī tābānī nazar ke shobadoñ se hai
'nadīm' is raah meñ sadiyoñ kī dīvāreñ bhī haa.il haiñ
na.ī duniyā abhī tak oT meñ in zulmatoñ se hai