dil dimāġh-o-jigar ye sab ik baar
kaam aa.e firāq meñ ai yaar
kyuuñ na ho zo.af ġhālib a.azā par
mar ga.e haiñ qushūn ke sardār
gul-e-pazhmurda kā nahīñ mamnūn
ham asīroñ kā gosha-e-dastār
mat nikal ghar se ham bhī raazī haiñ
dekh leñge kabhū sar-e-bāzār
saiñkaḌoñ harf haiñ girah dil meñ
par kahāñ pā.iye lab-e-iz.hār
sair kar dasht-e-ishq kā gulshan
ġhunche ho ho rahe haiñ sau sau ḳhaar
roz-e-mahshar hai raat hijrāñ kī
aisī ham zindagī se haiñ bezār
bahs naala bhī kījiyo bulbul
pahle paidā to kar lab-e-guftār
shukr kar dāġh-e-dil kā ai ġhāfil
kis ko dete haiñ dīda-e-bedār
go ġhazal ho ga.ī qasīda sī
āshiqoñ kā hai tuul harf-e-shi.ār
har sahar lag chalī to hai to nasīm
ai siyah-mast-nāz Tak hushiyār
shāḳhsāne hazār nikleñge
jo gayā us kī zulf kā ik taar
vājib-ul-qatl is qadar to huuñ
ki mujhe dekh kar kahe hai pukār
ye tū aayā na sāmne mere
laao merī miyāñ sipar talvār
aa ziyārat ko qabr āshiq par
ik tarah kā hai yaañ bhī josh-e-bahār
nikle hai merī ḳhaak se nargis
ya.anī ab tak hai hasrat-e-dīdār
'mīr'-sāhib zamāna nāzuk hai
donoñ hāthoñ se thāmiye dastār
sahal sī zindagī pe kaam ke tiiñ
apne uupar na kījiye dushvār
chaar din kā hai maj.hla ye sab
sab se rakhiye sulūk hī nā-chār
koī aisā gunāh aur nahīñ
ye ki kiije sitam kisī par yaar
vaañ jahāñ ḳhaak ke barābar hai
qadar haft-āsmāñ zulm-shi.ār
yahī darḳhvāst paas dil kī hai
nahīñ roza namāz kuchh darkār
dar-e-masjid pe halqa-zan ho tum
ki raho baiTh ḳhāna-e-ḳhummār
jī meñ aave so kījiyo pyāre
leak huujo na darpai āzār
hāsil-e-do-jahāñ hai yak harf
ho mirī jaan aage tum muḳhtār