kab talak ye sitam uThā.iyegā
ek din yūñhī jī se jā.iyegā
shakl tasvīr-e-be-ḳhudī kab tak
kaso din aap meñ bhī ā.iyegā
sab se mil chal ki hādse se phir
kahīñ DhūñDā bhī to na pā.iyegā
na muue ham asīrī meñ to nasīm
koī din aur baav khā.iyegā
kahiyegā us se qissa-e-majnūñ
ya.anī parde meñ ġham sunā.iyegā
us ke pā-bos kī tavaqqo.a par
apne tiiñ ḳhaak meñ milā.iyegā
us ke paañv ko jā lagī hai hinā
ḳhuub se haath use lagā.iyegā
shirkat-e-shaiḳh-o-barahman se 'mīr'
ka.aba-o-dair se bhī jā.iyegā
apnī DeḌh iiñT kī jaddī masjid
kisī vīrāne meñ banā.iyegā