ramaq ek jān-e-vabāl hai koī dam jo hai to azaab hai
dil-e-dāġh gashta kabāb hai jigar gudāḳhta aab hai
mirī ḳhalq mahv-e-kalām sab mujhe chhoḌte haiñ ḳhamosh kab
mirā harf rashk-e-kitāb hai marī baat likhne kā baab hai
jo vo likhtā kuchh bhī to nāma-bar koī rahtī muñh meñ tire nihāñ
tirī ḳhāmushī se ye nikle hai ki javāb ḳhat kā javāb hai
rahe haal dil kā jo ek sā to rujūa karte kahīñ bhalā
so tū ye kabhū hama daaġh hai kabhū nīm-soz kabāb hai
kaheñge kaho tumheñ log kyā yahī aarsī yahī tum sadā
na kaso kī tum ko hai Tak hayā na hamāre muñh se hijāb hai
chalo mai-kade meñ basar kareñ ki rahī hai kuchh barakat vahīñ
lab-e-nā-tovāñ kā kabāb hai dam-e-ābvāñ kā sharāb hai
nahīñ khultīñ āñkheñ tumhārī Tak ki ma.aal par bhī nazar karo
ye jo vahm kī sī numūd hai use ḳhuub dekho to ḳhvāb hai
ga.e vaqt aate haiñ haath kab hue haiñ gañvā ke ḳharāb sab
tujhe karnā hove so kar tū ab ki ye umr barq-e-shattāb hai
kabhū lutf se na suḳhan kyā kabhū baat kah na lagā liyā
yahī lahza lahza ḳhitāb hai vahī lamha lamha itaab hai
tū jahāñ ke bahr-e-amīq meñ sar par huā na buland kar
ki ye panj-roza jo buud hai kaso mauj-e-pur kā habāb hai
rakho aarzū mai-e-ḳhām kī karo guftugū ḳhat-e-jām kī
ki siyāh caroñ se hashr meñ na hisāb hai na kitāb hai
mirā shor sun ke jo logoñ ne kiyā pūchhnā tū kahe hai kyā
jise 'mīr' kahte haiñ sāhibo ye vahī to ḳhāna-ḳharāb hai