ham haiñ majrūh mājrā hai ye
vo namak chhiḌke hai maza hai ye
aag the ibtidā-e-ishq meñ ham
ab jo haiñ ḳhaak intihā hai ye
buud aadam numūd shabnam hai
ek do dam meñ phir huā hai ye
shukr us kī jafā kā ho na sakā
dil se apne hameñ gila hai ye
shor se apne hashr hai parda
yuuñ nahīñ jāntā ki kiyā hai ye
bas huā naaz ho chukā aġhmāz
har ghaḌī ham se kiyā adā hai ye
nāsheñ uThtī haiñ aaj yāroñ kī
aan baiTho to ḳhushnumā hai ye
dekh be-dam mujhe lagā kahne
hai to murda sā par balā hai ye
maiñ to chup huuñ vo hoñT chāTe hai
kyā kahūñ rījhne kī jā hai ye
hai re begānagī kabhū un ne
na kahā ye ki āshnā hai ye
teġh par haath dam-ba-dam kab tak
ik lagā chak ki mudda.ā hai ye
'mīr' ko kyuuñ na muġhtanim jaane
agle logoñ meñ ik rahā hai ye