ishq kyā kyā āfateñ laatā rahā
āḳhir ab duurī meñ jī jaatā rahā
mehr o mah gul phuul sab the par hameñ
chehra.ī chehra hī vo bhātā rahā
dil huā kab ishq kī rah kā dalīl
maiñ to ḳhud gum hī use paatā rahā
muñh dikhātā barsoñ vo ḳhush-rū nahīñ
chaah kā yuuñ kab talak naatā rahā
kuchh na maiñ samjhā junūn o ishq meñ
der nāseh mujh ko samjhātā rahā
daaġh thā jo sar pe mere sham.a saañ
paañv tak mujh ko vahī khātā rahā
kaise kaise ruk ga.e haiñ 'mīr' ham
muddatoñ muñh tak jigar aatā rahā