ḳhat se vo zor safā-e-husn ab kam ho gayā
chāh-e-yūsuf thā zaqan so chāh-e-rustam ho gayā
sīna-kobī-e-sañg se dil-e-ḳhūn hone meñ rahī
haq-ba-jānib thā hamāre saḳht mātam ho gayā
ek sā aalam nahīñ rahtā hai us aalam ke beach
ab jahāñ koī nahīñ yaañ ek aalam ho gayā
aañkh ke laḌte tirī āshob sā barpā huā
zulf ke dirham hue ik jam.a barham ho gayā
us lab-e-jāñ-baḳhsh kī hasrat ne maarā jaan se
āb-e-haivāñ yaman-e-tāle.a se mire sam ho gayā
vaqt tab tak thā to sajda masjidoñ meñ kufr thā
fā.eda ab jab ki qad mehrāb sā ḳham ho gayā
ishq un shahrī ġhazāloñ kā junūñ ko ab khiñchā
vahshat-e-dil baḌh ga.ī ārām-e-jāñ ram ho gayā
jī khiñche jaate haiñ fart-e-shauq se āñkhoñ kī aur
jin ne dekhā ek-dam us ko so be-dam ho gayā
ham ne jo kuchh us se dekhā so ḳhilāf-e-chashm-e-dāsht
apnā izrā.īl vo jaan mujassam ho gayā
kyā kahūñ kyā tarheñ badleñ chaah ne āḳhir ko 'mīr'
thā girah jo dard chhātī meñ so ab ġham ho gayā