moh meñ sajde meñ par naqsh merā baar rahā
us āstāñ pe mirī ḳhaak se ġhubār rahā
junūñ meñ ab ke mujhe apne dil kā ġham hai pe haif
ḳhabar lī jab ki na jaame meñ ek taar rahā
bashar hai vo pe khulā jab se us kā dām-e-zulf
sar-e-rah us ke farishte hī kā shikār rahā
kabhū na āñkhoñ meñ aayā vo shoḳh ḳhvāb kī tarah
tamām-umr hameñ us kā intizār rahā
sharāb-e-aish mayassar huī jise ik shab
phir us ko roz-e-qayāmat talak ḳhumār rahā
butāñ ke ishq ne be-iḳhtiyār kar Daalā
vo dil ki jis kā ḳhudā.ī meñ iḳhtiyār rahā
vo dil ki shām-o-sahar jaise pakkā phoḌā thā
vo dil ki jis se hamesha jigar-figār rahā
tamām-umr ga.ī us pe haath rakhte hameñ
vo dardnāk alarraġhm be-qarār rahā
sitam meñ ġham meñ sar-anjām us kā kyā kahiye
hazāroñ hasrateñ thiiñ tis pe jī ko maar rahā
bahā to ḳhuun ho āñkhoñ kī raah bah niklā
rahā jo sīna-e-sozāñ meñ dāġhdār rahā
so us ko ham se farāmosh-kāriyoñ le ga.e
ki us se qatra-e-ḳhūñ bhī na yādgār rahā
galī meñ us kī gayā so gayā na bolā phir
maiñ 'mīr' 'mīr' kar us ko bahut pukār rahā