zaḳhm jhele daaġh bhī khaa.e bahut

dil lagā kar ham to pachhtā.e bahut

jab na tab jāgah se tum jaayā kiye

ham to apnī or se aa.e bahut

dair se sū-e-haram aayā na Tuk

ham mizāj apnā idhar laa.e bahut

phuul gul shams o qamar saare hī the

par hameñ in meñ tumhīñ bhaa.e bahut

gar bukā is shor se shab ko hai to

roveñge sone ko ham-sā.e bahut

vo jo niklā sub.h jaise āftāb

rashk se gul phuul murjhā.e bahut

'mīr' se pūchhā jo maiñ āshiq ho tum

ho ke kuchh chupke se sharmā.e bahut