ek parvāz ko bhī ruḳhsat-e-sayyād nahīñ
varna ye kunj-e-qafas baiza-e-faulād nahīñ
shaiḳh-e-uzlat to tah-e-ḳhāk bhī pahuñchegī baham
muft hai sair ki ye ālam-e-ījād nahīñ
daad le chhoḌūñ maiñ sayyād se apnī lekin
zo.af se mere ta.iiñ tāqat-e-faryād nahīñ
kyuuñ hī ma.azūr bhī rakh yuuñ to samajh dil meñ shaiḳh
ye qadah-ḳhvār mire qābil-e-irshād nahīñ
be-sutūñ bhī hai vahī aur vahī jū-e-shīr
thā namak shohrat-e-shīrīñ kā so farhād nahīñ
kyā kahūñ 'mīr' farāmosh kiyā un ne tujhe
maiñ to taqrīb bhī kī par tū use yaad nahīñ