kis husn se kahūñ maiñ us kī ḳhush-aḳhtarī kī
is māh-rū ke aage kyā taab mushtarī kī
rakhnā na thā qadam yaañ juuñ baad be-tāmmul
sair is jahāñ kī rahrav par tū ne sarsarī kī
shub.hā bahāl sag meñ ik umr sirf kī hai
mat pūchh in ne mujh se jo ādmī-garī kī
paa.e gul us chaman meñ chhoḌā gayā na ham se
sar par hamāre ab ke mannat hai be-parī kī
pesha to ek hī thā us kā hamārā lekin
majnūñ ke tāle.oñ ne shohrat meñ yāvarī kī
girye se dāġh-e-sīna taaza hue haiñ saare
ye kisht-e-ḳhushk tū ne ai chashm phir harī kī
ye daur to muāfiq hotā nahīñ magar ab
rakhiye binā-e-tāza is charḳh-e-chambarī kī
ḳhūbāñ tumhārī ḳhūbī tā-chand naql kariye
ham rañja-ḳhātiroñ kī kyā ḳhuub dilbarī kī
ham se jo 'mīr' uḌ kar aflāk-e-charḳh meñ haiñ
un ḳhaak meñ malūñ kī kaahe ko hamsarī kī