dil ga.e aafat aa.ī jānoñ par

ye fasāna rahā zabānoñ par

ishq meñ hosh o sabr sunte the

rakh ga.e haath so to kānoñ par

garche insān haiñ zamīñ se vale

haiñ dimāġh un ke āsmānoñ par

shahr ke shoḳh sāda-rū laḌke

zulm karte haiñ kyā javānoñ par

arsh o dil donoñ kā hai paaya buland

sair rahtī hai un makānoñ par

jab se bāzār meñ hai tujh sī matā

bhiiḌ hī rahtī hai dukānoñ par

log sar dene jaate haiñ kab se

yaar ke paañv ke nishānoñ par

kajī obāsh kī hai vo dar-band

Daale phirtā hai band shānoñ par

koī bolā na qatl meñ mere

mohr kī thī magar dahānoñ par

yaad meñ us ke sāq-e-sīmīñ kī

de de mārūñ huuñ haath rānoñ par

the zamāne meñ ḳharchī jin kī ruupe

phāñsā karte haiñ un ko aanoñ par

ġham o ġhussa hai hisse meñ mere

ab ma.īshat hai un hī khānoñ par

qisse duniyā meñ 'mīr' bahut sune

na rakho gosh un fasānoñ par