sitam se go ye tire kushta-e-vafā na rahā

rahe jahān meñ to dair meñ rahā na rahā

kab us kā naam liye ġhash na aa gayā mujh ko

dil-e-sitam-zada kis vaqt us meñ jā na rahā

milānā aañkh kā har-dam fareb thā dekhā

phir ek dam meñ vo be-dīd āshnā na rahā

muue to ham pe dil par ko ḳhuub ḳhālī kar

hazār shukr kaso se hameñ gila na rahā

udhar khulī mirī chhātī idhar namak chhiḌkā

jarāhat us ko dikhāne kā ab maza na rahā

huā huuñ tañg bahut koī din meñ sin liijo

ki jī se haath uThā kar vo uTh gayā na rahā

sitam kā us ke bahut maiñ nazār huuñ mamnūn

jigar tamām huā ḳhūn-o-dil bajā na rahā

agarche rah ga.e the ustuḳhvān-o-post vale

lagā.ī aisī ki tasma bhī phir lagā na rahā

hamīyat us ke ta.iiñ kahte haiñ jo 'mīr' meñ thī

gayā jahāñ se pe terī galī maiñ aa na rahā