lagā.eñ aag hī dil meñ ki kuchh ujālā ho
kisī bahāne to is ghar kā bol-bālā ho
numūd-e-sub.h ko kaise kare jahāñ taslīm
koī kiran ho kahīñ naam ko ujālā ho
na tum mile na ye duniyā-e-ġham hī raas aa.ī
tum hī batāo ki is ġham kā kyā izāla ho
ajab ajab sī haiñ afvāheñ garm zindāñ meñ
ajab nahīñ ki isī shab yahāñ ujālā ho
phir us kī baat kā kaise yaqīn aa jaa.e
vo jis kī baat kā andāz hī nirālā ho
kashāñ kashāñ hī chalo ye ravish hī behtar hai
kahīñ na zikr ho apnā na kuchh havāla ho