lazzat-e-hijr ne taḌpāyā bahut rusvā kiyā
toḌ kar pheñkā mire zabt ko gum-gashta kiyā
aañkh se TuuT ke barsā mire ḳhvāboñ kā lahū
dil kī dahlīz pe tanhā.ī ne jab sajda kiyā
maiñ vahāñ rah gayā dekhā mujhe logoñ ne yahāñ
haa.e taqsīm mujhe ishq ne ye kaisā kiyā
āgahī baḳhsh ke tartīb diyā pahle mujhe
ishq ne ruuh ko is jism se phir chaltā kiyā
ḳhāmushī ko na samajh le vo kahīñ merī shikast
hashr jī-jān meñ jāñ-levā sā ḳhud barpā kiyā
ḳhud se laḌte hue le aayā huuñ maiñ ḳhud ko vahāñ
mere saa.e ne judā mujh se jahāñ rasta kiyā
ho na jā.ūñ kahīñ gum-gashta na miT jā.ūñ kahīñ
be-sabab dil kī tabāhī kā miyāñ charchā kiyā
ḳhauf thā dasht utar jaa.e na mujh meñ tab hī
chashm-e-tishna kā makīñ bahtā huā dariyā kiyā
ḳhud se bichhḌā to khulā raaz ye dil par mere
apnī pahchān ho qismat ne mujhe tanhā kiyā
dil pe kyā mauj-e-'nasīmī' ne mire bosa dharā-
dil kī vahshat pe takallum ne mire qabza kiyā