paḌtā thā is ḳhayāl kā saayā yahīñ kahīñ
bahtā thā mere ḳhvāb kā dariyā yahīñ kahīñ
jaane kahāñ hai aaj magar pichhlī dhuup meñ
dekhā thā ek abr kā TukḌā yahīñ kahīñ
dekho yahīñ pe hoñgī tamannā kī kirchiyāñ
TuuTā thā e'tibār kā shīsha yahīñ kahīñ
kañkar uThā ke dekh rahā huuñ ki ek din
rakkhā thā maiñ ne dil kā nagīna yahīñ kahīñ
ik roz be-ḳhayālī meñ barbād ho ga.ī
ābād thī ḳhayāl kī duniyā yahīñ kahīñ