mirī din ke ujāloñ par nazar hai

sitāroñ kā karishma raat bhar hai

vo hañstā hai magar ruḳhsār nam haiñ

ye shāyad pichhle mausam kā asar hai

kisī kī aib-jūī hī kiyā kar

abhī ke daur meñ ye bhī hunar hai

yahāñ ke saare mausam ek se haiñ

yahī is shahr kī taaza ḳhabar hai

sipāhī jañg se kab lauTte haiñ

vo koī aur hai zinda agar hai

akelā raat ko din kar rahā huuñ

mirī gardish meñ shāmil har bashar hai

ye jugnū kal kā sūraj devtā hai

magar ye tīrgī par munhasir hai

ḳhudā to ek hai lekin sunā hai

zamāna ek ke aage sifar hai