nazar milī thī kisī be-ḳhabar se pahle bhī

sadā-e-tishna uThī thī jigar se pahle bhī

ye sehr kam hai ki shādāb ho gayā sahrā

bahe the ashk bahut chashm-e-tar se pahle bhī

nayā nahīñ hai taqāzā-e-shīsha-o-tesha

guzar chukā huuñ maiñ is dard-e-sar se pahle bhī

maiñ ḳhaak chhānne vaalā savād-e-sahrā kā

paḌe the paañv meñ chhāle safar se pahle bhī

hisār-e-lafz-o-bayāñ meñ na rah sakā 'nāmī'

ki āshnā thā maqām-e-hunar se pahle bhī