matā-e-ābrū le kar atā se kuchh nahīñ hotā
bahā ho ḳhūn-e-dil to ḳhūñ-bahā se kuchh nahīñ hotā
mizāj-e-dil bigaḌ jaa.e to phir ai mehrbāñ suniye
jafā se kuchh nahīñ hotā vafā se kuchh nahīñ hotā
sar-e-maqtal tumhāre kārnāme sab ne dekhe haiñ
sar-e-mimbar bahut āh-o-bukā se kuchh nahīñ hotā
zabāñ khul jaa.e to sab bandisheñ be-sūd hotī haiñ
qadam uTh jaa.eñ to zanjīr-e-pā se kuchh nahīñ hotā