fikr-e-zar meñ bilaktā huā aadmī

ab kahāñ rah gayā kaam kā aadmī

zindagī bhī haqīqat meñ ik jurm hai

umr bhar kāTtā hai sazā aadmī

kaun apnā.e maazī kī parchhā.iyāñ

kaun paidā kare ab nayā aadmī

ḳhūb-sūrat sī is par kahānī likho

gaañv kī goriyāñ shahr kā aadmī

the bahut log mahfil meñ baiThe hue

un meñ mushkil se ik mil gayā aadmī

ye kamāl-e-ḳhudī hī kahā jā.egā

ḳhud hī duniyā banāne lagā aadmī

tum bhī 'sāhir' zarā is se bach kar raho

gaañv se hai alag shahr kā aadmī