sharīk-e-ġham koī kab mo'atabar nikaltā hai

sivā.e dal ke so vo be-ḳhabar nikaltā hai

ye kaisā shahr hai kaisī hai sar-zamīñ us kī

jahāñ kī ḳhaak palaTtā huuñ sar nikaltā hai

jidhar haiñ pyāse udhar bārisheñ haiñ tīroñ kī

jidhar ġhanīm hai dariyā udhar nikaltā hai

use ḳhabar hai ki zulmat hai saf-ba-saf har-sū

ujālā haath meñ le kar sipar nikaltā hai

hafīz hāthoñ kā saaya hai sā.ebāñ jaisā

yaqīn hotā hai dil ko na Dar nikaltā hai

ajiib dhund hai dasht-e-safar pe chhā.ī huī

na ḳhatm hotā hai rasta na ghar nikaltā hai

'mujībī' sauñp dī jis ko matā-e-jāñ maiñ ne

usī kā qarz mire naam par nikaltā hai