aag dekhūñ kabhī jaltā huā bistar dekhūñ

raat aa.e to yahīñ ḳhvāb-e-mukarrar dekhūñ

ek bechain samundar hai mire jism meñ qaid

TuuT jaa.e jo ye dīvār to manzar dekhūñ

raat gahrī hai bahut raaz na degī apnā

maiñ to sūraj bhī nahīñ huuñ ki utar kar dekhūñ

ḳhud pe kyā biit ga.ī itne dinoñ meñ tujh bin

ye bhī himmat nahīñ ab jhāñk ke andar dekhūñ

koī is daur meñ elān-e-nabūvat kartā

aarzū thī ki ḳhudā-sāz payambar dekhūñ

ek sannāTā huuñ patthar ke jigar meñ paivast

maiñ koī but to nahīñ huuñ ki nikal kar dekhūñ

yuuñ nashe se kabhī do chaar tirā ġham ho ki maiñ

band āñkhoñ se khulī aañkh kā manzar dekhūñ

oḌh kar ḳhaak 'mujībī' sunūñ dushnām-e-jahāñ

ye tamāshā hī kisī roz miyāñ kar dekhūñ