mere sivā bhī koī giraftār mujh meñ hai
yā phir mirā vajūd hī bezār mujh meñ hai
merī ġhazal kisī ke takallum kī bāzgasht
ik yār-e-ḳhush-kalām-o-tarah-dār mujh meñ hai
had hai ki tū na merī aziyyat samajh sakā
shāyad koī balā kā adākār mujh meñ hai
jis kā vajūd vaqt se pahle kī baat hai
vo bhī adam se barsar-e-paikār mujh meñ hai
tū hai ki terī zaat kā iqrār har-nafas
maiñ huuñ ki merī zaat kā inkār mujh meñ hai
tujh se na kuchh kahā to kisī se na kuchh kahā
kitnī shadīd ḳhvāhish-e-iz.hār mujh meñ hai
maiñ kyā huuñ kā.enāt meñ kuchh bhī nahīñ huuñ maiñ
phir kyuuñ isī savāl kī takrār mujh meñ hai
jis din se maiñ visāl kī āsūdgī meñ huuñ
us din se vo firāq se do-chār mujh meñ hai
maiñ huuñ ki ek pal kī bhī fursat nahīñ mujhe
vo hai ki ek umr se be-kār mujh meñ hai