koī naġhma banūñ chāñdnī ne kahā chāñdnī ke liye ek taaza ġhazal
koī taaza ġhazal phir kisī ne kahā phir kisī ke liye ek taaza ġhazal
zaḳhm-e-furqat ko palkoñ se siite hue saañs lene kī aadat meñ jiite hue
ab bhī zinda ho tum zindagī ne kahā zindagī ke liye ek taaza ġhazal
us kī ḳhvāhish pe tum ko bharosā bhī hai us ke hone na hone kā jhagḌā bhī hai
lutf aayā tumheñ gumrahī ne kahā gumrahī ke liye ek taaza ġhazal
aisī duniyā meñ kab tak guzārā kareñ tum hī kah do ki kaise gavārā kareñ
raat mujh se mirī bebasī ne kahā bebasī ke liye ek taaza ġhazal
manzaroñ se bahalnā zarūrī nahīñ ghar se bāhar nikalnā zarūrī nahīñ
dil ko raushan karo raushnī ne kahā raushnī ke liye ek taaza ġhazal
maiñ ibādat bhī huuñ maiñ mohabbat bhī huuñ zindagī kī numū kī alāmat bhī huuñ
merī palkoñ pe Thahrī namī ne kahā is namī ke liye ek taaza ġhazal
ārzūoñ kī maalā pirone se haiñ ye zamīñ āsmāñ mere hone se haiñ
mujh pe bhī kuchh kaho aadmī ne kahā aadmī ke liye ek taaza ġhazal
apnī tanhā.ī meñ raat maiñ thā magan ek aahaT huī dhyān meñ daf.atan
mujh se bāteñ karo ḳhāmushī ne kahā ḳhāmushī ke liye ek taaza ġhazal
jab rifāqat kā sāmāñ baham kar liyā maiñ ne āḳhir use ham-qadam kar liyā
ab mire dukh saho ham-rahī ne kahā ham-rahī ke liye ek taaza ġhazal