aaj bām-e-harf par imkān bhar maiñ bhī to huuñ

merī jānib ik nazar ai dīda-var maiñ bhī to huuñ

be-amāñ saa.e kā bhī rakh bād-e-vahshat kuchh ḳhayāl

dekh kar chal darmiyān-e-bām-o-dar maiñ bhī to huuñ

raat ke pichhle pahar pur-shor sannāToñ ke beach

tū akelī to nahīñ ai chashm-e-tar maiñ bhī to huuñ

tū agar merī talab meñ phir rahā hai dar-ba-dar

apnī ḳhātir hī sahī par dar-ba-dar maiñ bhī to huuñ

terī is tasvīr meñ manzar mukammal kyuuñ nahīñ

maiñ kahāñ huuñ ye batā ai naqsh-gar maiñ bhī to huuñ

sun asīr-e-ḳhush-adā.ī muntashir tū hī nahīñ

maiñ jo ḳhush-atvār huuñ zer-o-zabar maiñ bhī to huuñ

ḳhud-pasandī merī fitrat kā bhī vasf-e-ḳhās hai

be-ḳhabar tū hī nahīñ hai be-ḳhabar maiñ bhī to huuñ

dekhtī hai juuñ hī paspā.ī pe āmāda mujhe

ruuh kahtī hai badan se be-hunar maiñ bhī to huuñ

dasht-e-hairat ke safar meñ kab tujhe tanhā kiyā

ai junūñ maiñ bhī to huuñ ai ham-safar maiñ bhī to huuñ

kūza-gar be-sūratī sairāb hone kī nahīñ

ab mujhe bhī shakl de is chaak par maiñ bhī to huuñ

yuuñ sadā detā hai akasr koī mujh meñ se mujhe

tujh ko ḳhush rakkhe ḳhudā yūñhī magar maiñ bhī to huuñ