sabhī ye pūchhte rahte haiñ kyā gum ho gayā hai

batā duuñ? mujh se ḳhud apnā patā gum ho gayā hai

tumhāre din meñ ik rūdād thī jo kho ga.ī hai

hamārī raat meñ ik ḳhvāb thaa, gum ho gayā hai

vo jis ke pech-o-ḳham meñ dāstāñ lipTī huī thī

kahānī meñ kahīñ vo mājrā gum ho gayā hai

zarā ahl-e-junūñ aao hameñ rasta sujhāo

yahāñ ham aql vāloñ kā ḳhudā gum ho gayā hai

nazar baaqī hai lekin tāb-e-nazzāra nahīñ ab

suḳhan baaqī hai lekin mudda.ā gum ho gayā hai

mujhe dukh hai ki zaḳhm o rañj ke is jamghaTe meñ

tumhārā aur merā vāqi.a gum ho gayā hai

ye shiddat dard kī us ke na hone se na hotī

yaqīnan aur kuchh us ke sivā gum ho gayā hai

vo jis ko khīñchne se zaat kī parteñ khuleñgī

hamārī zindagī kā vo sirā gum ho gayā hai

vo dar vā ho na ho, āzād o ḳhud-bīñ ham kahāñ ke

palaT aa.eñ to samjho rāstā gum ho gayā hai