kisī kā kaam dil is charḳh se huā bhī hai

koī zamāne meñ ārām se rahā bhī hai

kisī meñ mehr-o-mohabbat kahīñ vafā bhī hai

koī kisī kā zamāne meñ āshnā bhī hai

koī falak kā sitam mujh se bach rahā bhī hai

janā nasīb koī mujh sā dūsrā bhī hai

burā na māniyo maiñ pūchhtā huuñ ai zālim

ki be-kasoñ ke satā.e se kuchh bhalā bhī hai

jo puḳhta-maġhz haiñ ve soz-e-dil nahīñ kahte

kisī ne sham.a se jalne meñ kuchh sunā bhī hai

tum is qadar jo niDar ho ke zulm karte ho

butāñ hamārā tumhārā koī ḳhudā bhī hai

tū qātiloñ se lagātā hai dil ko kyuuñ 'tābāñ'

ki un ke haath se jiitā koī bachā bhī hai