kahne ko sham-e-bazm-e-zamān-o-makāñ huuñ maiñ

socho to sirf kushta-e-daur-e-jahāñ huuñ maiñ

aatā huuñ maiñ zamāne kī āñkhoñ meñ raat din

lekin ḳhud apnī nazroñ se ab tak nihāñ huuñ maiñ

jaatā nahīñ kināroñ se aage kisī kā dhyān

kab se pukārtā huuñ yahāñ huuñ yahāñ huuñ maiñ

ik Dūbte vajūd kī maiñ hī pukār huuñ

aur aap hī vajūd kā andhā kuaañ huuñ maiñ

cigarette jise sulagtā huā koī chhoḌ de

us kā dhuāñ huuñ aur pareshāñ dhuāñ huuñ maiñ