maiñ bhī kab se chup baiThā huuñ vo bhī kab se chup baiThī hai

ye hai visāl kī rasm anokhī ye milne kī riit na.ī hai

vo jab mujh ko dekh rahī thī maiñ ne us ko dekh liyā thā

bas itnī sī baat thī lekin baḌhte baḌhte kitne baḌhī hai

be-sūrat be-jism āvāzeñ andar bhej rahī haiñ havā.eñ

band haiñ kamre ke darvāze lekin khiḌkī khulī huī hai

mere ghar kī chhat ke uupar sūraj aayā chāñd bhī utrā

chhat ke nīche ke kamroñ kī jaisī thī auqāt vahī hai