bahs meñ donoñ ko lutf aatā rahā
mujh ko dil maiñ dil ko samjhātā rahā
un kī mahfil meñ dil-e-pur-iztirāb
ek sho.ala thā jo tharrātā rahā
maut ke dhoke meñ ham kyuuñ aa ga.e
zindagī kā bhī mazā jaatā rahā
nā-shagufta hī rahī dil kī kalī
mausam-e-gul bār-hā aatā rahā
jab se tum ne dushmanī kī iḳhtiyār
e'tibār-e-dostī jaatā rahā
apnī hī zid kī dil-e-betāb ne
un ke dar tak bhī maiñ samjhātā rahā
jaur to ai 'josh' āḳhir jaur hai
lutf bhī un kā sitam Dhātā rahā