harf ma.anī se judā ho jaise
zindagī koī sazā ho jaise
ba.ad muddat ke ye mahsūs huā
dard hī dil kī davā ho jaise
aur kyā hogī fazā-e-firdaus
tere kūche kī fazā ho jaise
un nigāhoñ ne jo pursish kī hai
aaj har zaḳhm harā ho jaise
aap se mil ke to kuchh aisā lagā
fāsla aur baḌhā ho jaise
aah kyā umr guzārī ham ne
naqsh ban ban ke miTā ho jaise
kaañp jaatā huuñ uqūbat se 'ziyā'
ab mujhe ḳhauf-e-ḳhudā ho jaise