aao taqdīr ko tadbīr banā kar dekheñ
in añdheroñ ko ujāloñ se milā kar dekheñ
aaj zālim ko bhī majbūr banā kar dekheñ
hashr se pahle hī ik hashr uThā kar dekheñ
in butoñ se to koī kaam na niklā apnā
ḳhair ab yūñhī sahī yād-e-ḳhudā kar dekheñ
chāñd-tāroñ meñ jo ābād hue jaate haiñ
vo kisī dil meñ bhī ghar apnā banā kar dekheñ
kaun apnā hai yahāñ kaun hai begāna 'ziyā'
dhajjiyāñ ham bhī to dāman kī uḌā kar dekheñ