hamīñ par dhuup barsātā hai sūraj bhī muqaddar bhī
daraḳht-e-mehrbāñ koī kare saaya to ham par bhī
ayaañ hotī chalī jaatī haiñ sab chehre kī tahrīreñ
huī jaatī hai nā-kāfī ḳhamoshī kī ye chādar bhī
badan kī raushnī meñ jo na dekhā jā sakā ham se
usī shīshe ke paikar meñ dhaḌaktā thā vo patthar bhī
haqīqat se tasavvur tak safar mujh meñ kiyā us ne
magar mujh tak nahīñ pahuñchā vo itnī duur chal kar bhī
koī mūsā-o-īsā-o-mohammad ab na aa.egā
hamāre nā-tavāñ shānoñ pe hai kār-e-payambar bhī