bajā ki darpai-e-āzār chashm-e-tar hai bahut

palaT ke ā.ūñgā maiñ garche ye safar hai bahut

Thahar sako to Thahar jaao mere pahlū meñ

vo dhuup hai ki yahī sāya-e-shajar hai bahut

darīda bāheñ ḳhizāñ meñ pukārtī haiñ chalo

havā-e-tund meñ har shāḳh be-sipar hai bahut

kahūñ to vo mirī rūdād-e-dard bhī na sune

ki jaise us ko mire haal kī ḳhabar hai bahut

kalī ḳhumār ke aalam meñ kasmasātī hai

khulī hai aañkh magar niiñd kā asar hai bahut

mirā qadam hī nahīñ hijr meñ bagūla-sifat

bichhaḌ ke mujh se tirā ġham bhī dar-ba-dar hai bahut

haiñ muntazir ki ye dariyā-e-dard kab utre

haiñ ḳhush ki dil kā safīna to mauj par hai bahut

na ḳhalvat-e-ġham-e-duniyā na bazm-e-jāñ 'tausīf'

tumhāre vāste ik bekasī kā ghar hai bahut