chain pahlū meñ use sub.h nahīñ shaam nahīñ

ek dam bhī dil-e-bīmār ko ārām nahīñ

ruḳh par nuur nahīñ zulf-e-siyah-fām nahīñ

vo zamāna nahīñ vo sub.h nahīñ shaam nahīñ

shahroñ shahroñ mirī rusvā.ī kā shohrā pahuñchā

mujh sā duniyā meñ koī āshiq-e-bad-nām nahīñ

chāñd hī tāroñ kī jhurmuT meñ zarā dekh ai dil

goñ meñ shoḳh-e-nasārā kī ye bū-tām nahīñ

vā.izoñ jaa.e jahannam meñ fazā-e-jannat

ḳhaar haiñ gul merī nazroñ meñ jo gulfām nahīñ

naale kartā huuñ kabhī yā kabhī tadbīr-e-visāl

aur to hijr kī shab meñ mujhe kuchh kaam nahīñ

fasl-e-gul aa.ī to kyā be-sar-o-sāmāñ haiñ ham

shīsha-o-jām nahīñ sāqī-e-gul-fām nahīñ

dil gayā diin gayā jaan ga.ī ulfat meñ

aur āġhāz hī dekhā abhī anjām nahīñ

bose do tiin to le lene dī mujh ko lillāh

kaam ke vaqt na kar o but ḳhud kaam nahīñ

laḳhlaḳha kī evaz us zulf kī bū sūghuñgā

hai tap-e-ishq meñ saudā mujhe sarsām nahīñ

naza.a meñ dekh ke jiitā huuñ tire koThe ko

lab-e-īsā hai ye ai jaan lab-e-bām nahīñ

'mehr' be-lutf hai bazm-e-sho.arā be-ma.ashūq

bulbuleñ chahchahe meñ haiñ koī gulfām nahīñ